क्लिकबेट बातमी: भारताचे सर्वाधिक यशस्वी पंतप्रधान नरेंद्र मोदींना (IG) नोबेल पुरस्कार जाहीर

सर्वकालीन सर्वोत्तम जागतिक नेते आणि भारताचे सर्वोत्कृष्ट पंतप्रधान नरेंद्र मोदींना यावर्षीचा सर्वाधिक प्रतिष्ठेचा समजल्या जाणाऱा (IG) नोबेल पुरस्कार जाहीर करण्यात आला आहे. कोव्हीडसारख्या जागतिक महामारीचा सामना करण्यात त्यांनी दाखवलेलं अभूतपूर्व कौशल्य आणि अतुलनीय नेतृत्वगुणांची दखल आम्ही घेत असल्याचं नोबेल समितीनं यावेळी म्हटलं. नुकताच आपला ७० वा वाढदिवस साजरा केलेल्या आपल्या सर्वांच्या लाडक्या पंतप्रधानांना नोबेल समितीकडून हे बर्थडे गिफ्ट जाहीर करण्यात आलं. 

अमेरिकेचे राष्ट्राध्यक्ष डोलांड ट्रम्प, ब्राझीलचे राष्ट्राध्यक्ष बोल्सनारो आणि ब्रिटनचे पंतप्रधान बोरिस जॉन्सन यांच्यासोबत मोदींना हा पुरस्कार विभागून देण्यात आलेला आहे. कोरोनाच्या सर्वाधिक केसेस आणि मृत्यूंच्या आकड्यांमध्ये अमेरिका, भारत आणि ब्राझील आघाडीवर आहेत. कोव्हीडसारख्या जागतिक महामारीचा सामना करण्यासाठी जागतिक नेते आणि राजकारणी डॉक्टर्स आणि वैज्ञानिकांपेक्षाही महत्त्वाची भूमिका पार पाडू शकतात. भारताचे पंतप्रधान मोदी हे यासाठीचं आदर्श उदाहरण असून कोव्हीडसारख्या जागतिक महामारीचा सामना देशातील नेतृत्वाने कसा करू नये, याचा वस्तूपाठच मोदींनी‌ घालून दिला असल्याचं समितीनं म्हटलं आहे. कोरोनाच्या केसेसचा वाढता दर विक्रमी स्तरावर नेऊन‌ ठेवणे, कुठलाही वैज्ञानिक दृष्टीकोन न बाळगता नेटाने काम करत राहणे, प्रत्यक्षात लोकांची परिस्थिती काय आहे याचं काहीच भान न ठेवता अजेंडा रेटणे, केसेस आणि मृत्यूंचे आकडे लपवणे, व्यवस्थापनाच्या नावानं केवळ बोलबच्चन देणे अशा या न भूतो न भविष्यती नेतृत्वपद्धतीची दखल घेत या समितीनं मोदींचं कौतुक केलं आहे. हा मानाचा पुरस्कार मिळवणारे मोदी हे अटलबिहारी वाजपेयींनंतर दुसरेच पंतप्रधान ठरले आहेत, ही भारतासाठी अभिमानास्पद गोष्ट आहे. जागतिक शांतता प्रस्थापित करण्याच्या हेतूनं अतिशय संयम आणि दूरदृष्टी दाखवत कोणालाही न जुमानता अणूचाचणी घडवून आणल्याबद्दल वाजपेयींना याआधी १९९८ सालच्या शांततेच्या नोबेलने गौरवण्यात आलं होतं. 

याशिवाय जागतिक शांतता प्रस्थापित करण्यासाठी महत्वपूर्ण योगदान दिल्याबद्दल भारत आणि पाकिस्तानला यावर्षीचं शांततेचं नोबेलही विभागून देण्यात आलेलं आहे. भारत पाकिस्तानच्या उच्चपदस्थ सरकारी अधिकाऱ्यांनी मध्यरात्री एकमेकांच्या दूतावासातील दरवाजाची बेल वाजवून कोणी दार उघडण्याआधीच पळून जाण्यासारख्या अतिशय समजदार प्रकारांची विशेष करून दखल घेत जागतिक शांतता प्रस्थापित करण्यासाठी या दोन शत्रूराष्ट्रांनी मतभेद बाजूला ठेवून अतिशय संयम दाखवत जगासाठीच एक आदर्श घालून दिलेला असल्याचं या समितीनं म्हटलं आहे.

याशिवाय वेगवेगळ्या देशांमधील राष्ट्रीय उत्पनातील असलेला फरक आणि त्यादेशातील व्यक्तीचं चुंबनाचं सरासरी प्रमाण यामधील आंतरसंबंध प्रस्थापित करून सूक्ष्मलक्षी अर्थशास्त्रीय विश्लेषणात मोलाची भर घालणाऱ्या इंग्लंड आणि पोलंडच्या अर्थशास्त्रज्ञांना अर्थशास्त्रातील नोबेल पुरस्कार जाहीर झाला. मानसशात्रातील नोबेल पुरस्स्कार डोळ्यांच्या भुवयांवरून आत्मकेंद्री मनुष्य असा ओळखावा? या अभूतपूर्व संसोधनाबद्दल कॅनडाच्या मिरांडा जियाकोमिना आणि निकोलस रूल या मानसशास्त्रज्ञांना जाहीर करण्यात आला. मानवी विष्ठा गोठवून तयार केलेल्या चाकूने खून करता येत नाही कारण ते पुरेसे टोकदार नसतात, हा प्रयोग वैज्ञानिकदृष्ट्या सिद्ध करून दाखवणाऱ्या अमेरिकेच्या शास्त्रज्ञांना यावर्षीचा भौतिकशास्त्रातील सर्वाधिक मानाचा समजला जाणारा नोबेल पुरस्कार देण्यात आला. वैज्ञानिक क्षेत्रात अभूतपूर्व संशोधन आणि कामगिरी करून दाखवणाऱ्या संशोधकांना हा आईजी नोबेल पुरस्कार दरवर्षी देण्यात येतो. Annals Of Improbable Research या मासिकामार्फत हार्वर्ड रेडक्लिफ सोसायटीच्या सौजन्याने दरवर्षी सप्टेंबर महिन्यात हा सोहळा हार्वर्ड विद्यापीठाच्या सँडर्स थिएटरमध्ये आयोजित करण्यात येतो. मात्र यावर्षी कोव्हीडच्या अभूतपूर्व परिस्थितीमुळे हा सोहळा ऑनलाईनच पार पाडण्यात आला. वैद्यकीय क्षेत्र आणि जागतिक शांतता या दोन्ही महत्त्वाच्या समजल्या जाणाऱ्या पुरस्कारांमध्ये बाजी मारून भारताने यावर्षी नोबेल पारितोषिकावर आपली छाप सोडली.

ही बातमी खरी असली तरी तिचा उद्देश फक्त कठीण काळात थोडीशी कोपरखळी मारून हास्यनिर्मितीचा आहे. तरी विनाकारण भावना दुखावून घेऊ नये. घेतल्यास इंडी जर्नल त्यासाठी जवाबदार नाही.